Gasteizko memoriak bizi-bizirik jarraitzen duela erakusten dute azken datuek. Zaramaga auzoan 1976ko sarraskia ezagutarazteko Martxoak 3 elkarteak antolatzen dituen bisita gidatuek errekorra hautsi dute 2025ean: 2016an martxan jarri zirenetik, guztira 10.037 pertsonak parte hartu dute saio hauetan. Hazkunde hori 2026an beteko den 50. urteurrenaren atarian gertatu da.
Munduko memoriak Gasteizera begira
Urtarrilaren 8tik 25era bitartean, Izaskun Arrue Kulturguneak (IAK) «OROITERRI. Oroimenaren euskarriak» erakusketa hartuko du. Izena bi kontzepturen loturatik dator: «OROIT + HERRI». Proiektu honek munduko herrialde ezberdinetako memoria euskarriak biltzen ditu, eta gatazka nahiz borroka sozial ezberdinen aztarnak eta testigantzak hurbiltzen ditu hirira.
Egitaraua eta bisita gidatuak
Erakusketa honen inguruan hainbat ekitaldi antolatu dira urtarrilean zehar:
- Urtarrilak 8 (19:00): Irekiera ekitaldia, bisita gidatua eta luncha.
- Urtarrilak 10, 17 eta 24 (12:00): 45 minutuko bisita gidatuak (gehienez 20 pertsona), edukia «gertutasunez eta sakontasunez ezagutzeko aukera emanez».
- Urtarrilak 15 (19:00): Paul Casal musikariaren kontzertu akustikoa.
- Urtarrilak 22 (19:30): Ane, Oihane eta Iker talde arabarraren emanaldia.
2026an beteko dira 50 urte Polizia Armatua San Frantzisko elizan sartu zenetik. Sarraski hartan Pedro María Martínez Ocio, Francisco Aznar Clemente, Romualdo Barroso Chaparro, José Castillo eta Bienvenido Pereda hil zituzten. Handik gutxira, poliziak beste bi pertsona hil zituen Tarragonan eta Basaurin.
