Adimen artifizialaren aurpegia feministatik begiratuta Montehermoson

Abenduaren 10a Giza Eskubideen Eguna da eta horren harira, Montehermoso kulturunean erakusketa berri bat aurkeztu dute. Adimen Artifiziala feminista izan daiteke? galderari erantzuten saiatzen da erakusketa honek. Gaur goizean aurkeztu dute proiektua eta bihartik aurrera egongo da ikusgai, urtarrilaren 25era arte.

Erakusketa Colectiva Femias taldeak eta Mugarik Gabe GKEak sortu dute elkarrekin. Vitoria-Gasteizko Udalaren Giza Eskubideak eta Sormen Artistikoa programaren XIII. edizioan hautatu dute proposamena. Udalaren Garapenerako Lankidetza Zerbitzuak eta Montehermosok antolatu dute ekimena.

Aurkezpenean Ana López de Uralde zinegotziak azaldu du helburua dela giza eskubideei buruzko gogoeta artistikorako espazioak sortzea. Nabarmendu du hautatutako proposamenak aukera ematen duela adimen artifizialak eragiten dituen ondorio sozial eta kulturalak aztertzeko, berdintasuna, osotasun fisikoa eta parte-hartze kulturala bezalako eskubideetatik abiatuta.

Erakusketan Colectiva Femiaseko hiru kideek hartzen dute parte: Alejandra Bueno, Aiskoa Pérez eta Laura MM. Gainera, Felipe Ribas San Martín eta Rocío Soria artista gonbidatuak ere badaude. Egileen esanetan, proposamen honek galdera hau mahaigaineratzen du: zein gorputzek elikatzen dute adimen artifizialaren logika, zein errealitatetatik ikasten du eta zein ikuspegik geratzen dira atzean. Azaldu dute bi erakundeek ikuspegi desberdinetatik lan egiten badute ere, biak bat datoz teknologiarekiko ikuspegi feminista, kritiko eta kolektibo batetik galderak egitearen premian.

Erakusketa sei gunetan banatuta dago eta adimen artifizialari hainbat ikuspegitatik heltzen dio. Lehen zatian kontzeptu nagusiak azaltzen dira, hala nola adimen artifiziala, giza eskubideak edo prompt-ak zer diren. Bigarren eremuan bi erakundeek elkarrekin garatutako lankidetza-prozesua ikus daiteke. Hirugarren zatian taxonomiaren ideia lantzen da, adimen artifizialak erabiltzen dituen etiketak eta datu-baseen inguruan. Laugarren gunean ikusleak prompt pertsonalizatu bat jasoko du, instalazio interaktibo baten bidez. Bosgarren espazioan adimen artifizialaren bidez sortutako baina ikuspegi kritikoarekin egindako lanak erakutsiko dira. Azkenik, erakusketaren amaieran, bisitariak gonbidatzen dira ikusitakoa hausnartzera eta ikasitakoa baloratzera.

Hitzaldi eta jarduera irekiak erakusketaren inguruan

Erakusketa zabalik dagoen bitartean hainbat jarduera antolatuko dira jendearentzat. Abenduaren 11n, ostegunean, 18:30ean egingo da irekiera-ekitaldia Montehermoson. Hurrengo egunean, ostiralean, ordu berean, Adimen artifiziala eta indarkeria digitalak izeneko hitzaldia egingo da Ortuño aretoan. Luisa Fernanda Pineda Cadavid izango da hizlaria, emakumeen eskubideen aldeko aktibista eta ikerlaria, Kolonbiako Mujeres que Crean elkarteko kidea. Berak azalduko du nola bihurtzen diren teknologiak patriarkatu digitalaren parte eta nola erabil daitezkeen botereari aurre egiteko.

Abenduaren 19an, 18:00etan, erakusketako egileek bisita gidatu bat eskainiko dute. Bertan azalduko dute nola sortu duten lana eta parte-hartzaileekin elkarrizketan arituko dira.

Tailerrak talde zehatzei zuzenduta

Hitzaldi eta jarduera ireki horiez gain, hiru tailer berezi egingo dira gonbidapen bidez. Tailer horiek talde sozial eta komunitarioei zuzenduta daude. Helburua da adimen artifizialak nola sortzen dituen irudiak eta iruditeria aztertzea eta teknologia horiek dituzten aurreiritziak identifikatu eta zalantzan jartzea.