24 Korrikaren abesti ofiziala aurkeztu dute gaur Agoitzen. Pello Reparaz da abestiaren egilea eta abeslaria, eta harekin batera parte hartu dute grabazioan Maixux Zugarramurdik eta Erramun Martikorenak. Xiberutikan Mendebaldera izeneko kanta single batean grabatu dute, eta bideoklip bakarrarekin aurkeztu dute, plano-sekuentzia bakar batean grabatuta.
Aurkezpen-ekitaldian egon dira Reparaz bera eta Ane Elordi, Korrikaren koordinatzailea. Elordik azaldu duenez, lehen aldiz AEK osoko kideek kolektiboki erabaki dute nor arduratuko zen abestia sortzeaz. Azpimarratu du hautatutako proposamena zoragarria izan dela eta eskerrak eman dizkio musikariari egindako ekarpenagatik, bai euskarari eta bai euskal kulturari.
Reparazek aitortu du Korrikaren enkargua bere ibilbideko ardura handienetako bat eta aldi berean poza handienetako bat izan dela. Adierazi du ez dela ohiko lan bat izan, baizik eta euskara eta Korrikak berari eman diotena nolabait bueltan emateko modua.
Euskara ez da soilik hizkuntza bat, bizitzeko modu bat da
Aurten aukeratutako leloa, Euskara gara, inspirazio iturri garrantzitsua izan da abestia sortzeko. Reparazen hitzetan, ez gara soilik hizkuntzaz ari, baizik eta zaintzaz, elkarbizitzaz eta etorkizun duinago baten amets kolektiboaz. Horregatik, kanta ez da ereserki zurrun bat izatea bilatzen duen pieza, baizik eta komunitate baten soinua. Musikaria saiatu da entzuleak parte sentiarazten, abestiaren baitan koruaren parte balira bezala.
Kantaren helburuari buruz ere hitz egin du Reparazek. Azaldu du balio badu AEK-ko euskaltegietan izena emateko lehen urratsa emateko, ama batek alabai euskaraz hitz egitera animatzeko edo Korrikan kilometro bat erostera bultzatzeko, abestiak bere funtzioa beteko duela.
Xiberutik Bilbora, martxoaren 19tik 29ra
24 Korrika martxoaren 19an abiatuko da Atharratzen, Zuberoan, eta martxoaren 29an amaituko da Bilbon. Hamar gau eta hamaika egunez zeharkatuko du euskararen herria, ekimen herrikoi eta parte-hartzaile gisa. Edizio honetan, Errigora egitasmoa izango da omendua. Leloak, Euskara gara, jendarte osoari begiratzen dio. Antolatzaileen esanetan, euskara ez da muga, arnasa baizik. Euskara denon arteko zubi bihurtzea da erronka, guztion hizkuntza komuna bilakatzea nahi bada, gizarte kohesiorako tresna ere izan daitekeelako.
