Korrika Txikiak berriro hartuko ditu Gasteizko kaleak ostegun honetan, martxoaren 26an. Guztira, 39 ikastetxek parte hartuko dute euskararen aldeko haur lasterketan, eta 12 kilometro inguruko ibilbidea egingo dute hiriko hainbat auzotan barrena. Egitasmoa arratsaldeko 15.00etan abiatuko da Ariznabarratik, eta 17.00etan amaituko da Plaza Berrian, azken jaiarekin.
AEK-k antolatutako ekimen honek helburu argia du: euskarari indarra ematea, herritarrak kontzientziatzea eta Gasteizko haurrek euskararen aldeko atxikimendua erakustea. Lasterketan zehar lekukoa eskuz esku eta ikastetxez ikastetxe eramango dute, euskararen aldeko mezua hirian zabaltzeko.
Errota Eskola izango da aurtengo omendua
Aurtengo Korrika Txikian omendutako ikastetxea Errota Eskola izango da, eta berak irakurriko du amaierako mezua ere. Antolakuntzak azaldu duenez, aukeraketa ez da kasualitatea, izan ere, 2026-2027 ikasturtean Landazuri HLHI eta Santa Maria de Vitoria HLHI bateratzearen ondorioz sortuko da Errota Eskola HLHI berria.
Prentsa oharrean jasotzen denez, une berezia da komunitatearentzat, “auzo baten historia berria” idazten ari direlako, eskola publiko euskaldun, inklusibo eta komunitatean errotu baten alde. Horregatik, ilusioz irakurriko dute aurtengo mezua, ikasleen ahotsa, emozioa eta konpromisoa entzunarazteko.
Hainbat auzo zeharkatuko dituen ibilbidea
Lasterketa Ariznabarran hasiko da, eta handik Zabalgana, San Martin, Txagorritxu eta Lakua auzoetatik igaroko da. Ondoren, El Pilar eta Zaramagan sartuko da, gero Aranbizkarra eta Santa Luzia zeharkatzeko, eta amaitzeko hirigunera joko du, Plaza Berrian bukatuz.
Antolatzaileen arabera, Korrika Txikia urtez urte handitzen joan da, ikastetxe gehiagori parte hartzeko aukera emanez. Aurtengo edizioan 39 ikastetxek eramango dute lekukoa Gasteizen barrena.
Azken jaia Plaza Berrian
Behin lasterketa amaituta, 17.00etan hasiko da amaierako jaia Plaza Berrian. Han, Errota Eskolako ikasleek irakurriko dute Korrika Txikiaren mezua, eta ondoren Sumendiko Zunba Herrikoiko kideek girotuko dute ekitaldia, euskal abestiak dantzatuz. Antolatzaileek azaldu dutenez, jaialdia ostiralean Gasteiztik igaroko den 24. Korrikarako beroketa moduko bat ere izango da.
Marrazki lehiaketa eta unitate didaktikoa
Aurtengo edizioarekin batera, Korrikaren unitate didaktikoa ere prestatu dute ikastetxeentzat. Material horren bidez, ikasleek Korrikaren kanta ezagutu dute eta lasterketarako petoa prestatuko dute, besteak beste.
Horrez gain, Gasteizko haurrek marrazki lehiaketan ere parte hartu dute. Antolakuntzak adierazi duenez, marrazki ugari jaso dituzte, eta lan horiek martxoaren hasieran ikusgai egon dira Hegoalde, Lakua eta Aldabe gizarte etxeetan. Lehiaketako irabazlea Abendaño Ikastolako Laia izan da, eta haren marrazkia erabili dute aurtengo kartela osatzeko.
Parte hartuko duten ikastetxeak
Aurtengo Korrika Txikian parte hartuko duten 39 ikastetxeen artean daude, besteak beste, Hogar San José, Armentia, Mariturri, Zabalgana, Aldaialde, Miguel de Cervantes, Veracruz, Abendaño, IPI Sansomendi, Toki Eder, Ibaiondo, San Viator, Marianistas, Urkide, Ramon Bajo, Odon de Apraiz, Aranbizkarra, Salburua, Judimendi, Olabide eta Errota Eskola bera.