Egurrezko egitura duen eraikin berria egingo dute Barnekale Berrian, gazteentzako alokairuko zortzi etxebizitzarekin

Gasteizko Alde Zaharreko Barnekale Berriko 21 eta 23 zenbakietan eraikitzen ari diren etxebizitzak egurrezko egitura nagusia izango du, eta guztira zortzi etxebizitza izango ditu, gazteentzako alokairura bideratuak. Hala jakinarazi du Udalak ohar baten bidez.

Udalak azaldu duenez, eraikina izei egur kontratxapatuarekin (CLT) egituratzen ari dira. Material horrek, Udalaren arabera, hormigoiaren antzeko erresistentzia du, baina pisu txikiagoa, eta horrek garraioa eta muntaketa errazten ditu. Gainera, suteen aurkako segurtasunari buruzko araudi teknikoa betetzen duela nabarmendu du.

Ohar berean, Udalak adierazi du proiektua hirigintza eta arkitektura jasangarriaren aldeko apustuaren barruan kokatzen dela, karbono aztarna murrizteko, energia eraginkortasuna hobetzeko eta material berriztagarriak erabiltzeko helburuekin. Halaber, gogorarazi du egurra historikoki oso presente egon dela Alde Zaharreko eraikuntzan.

Sustapena Ensanche 21 Zabalguneak bultzatzen du, hamarkadetan erabilerarik gabe egon den lursail batean. Udalaren arabera, lehen aldia da udal sozietate honek zuzenean etxebizitza eraikuntza sustatzen duena.

Udalak azaldu du proiektua EH Bildurekin egindako aurrekontu akordioaren ondorio dela, eta etxebizitzak gazteentzako alokairura bideratuko direla, Alde Zaharra biziberritzeko eta gaztetzeko helburuarekin.

Azkenik, Ensanche 21ek obra osoaren jarraipena egiteko time-lapse bideo bat eskainiko duela jakinarazi du Udalak, hasieratik amaierara arteko prozesua jasoko duena.