Ura Bere Bidean proiektuaren hirugarren edizioak hartuko du Buesa Arena

Ura Bere Bidean Korala berriz ere izango da ikusgai Gasteizen. Irailaren 20an, larunbatez, Buesa Arenan egingo da Araban inoiz antolatu den mobilizazio koral handienetako bat. Hirugarren edizio honek marka guztiak gaindituko ditu: 33 abesbatza, 700 ahots inguruko parte-hartzea eta Gatibu taldearen azken kontzertua Araban.

Euskal musikaren omenezko bertsio koralak

2020an sortu zen Ura Bere Bidean egitasmoa, euskal musikaren balioa azpimarratzeko asmoarekin. 2023az geroztik, Arabak bere lekua hartu du proiektuan, eta orain Korala ikuskizunaren edizio berria dator, berritasun eta emozioz beterik.

Fernando Velázquez konpositore ezagunak moldatutako abesti koralak izango dira entzungai. Ikuskizunak formatu coralpop-ean euskal talde klasikoen eta garaikideen kantuak eskainiko ditu: Sorotan Bele, Doctor Deseo, ETS, Zetak, Zea Mays, Su Ta Gar edota Eñaut Elorrieta, besteak beste. Guztia ikus-entzunezko muntaketa berezi batekin osatua, Iñaki Irastorzaren diseinuari esker.

Araban inoiz baino abesbatza gehiago taula gainean

Aurten, guztira 33 abesbatzak hartuko dute parte —iaz baino 9 gehiago—, eta Arabako txoko guztietatik etorritako 700 lagun inguruk osatuko dute ikuskizun korala. Hiru abesbatza nagusi, 21 helduen abesbatza eta 9 haur edo gaztetxoen talde izango dira taula gainean. Guztiak Aitor Antruejoren gidaritzapean ariko den banda pop batekin lagunduta.

Ekitaldiak, gainera, 30.000 euro inguruko sarrerak sortuko ditu Arabako abesbatzen kolektiboarentzat.

Gatiburen azken kontzertua Araban

Gauak une berezi bat izango du: Gatibu taldearen agurra Araban. Euskal rockaren ikur bihurtu den taldeak bere azken kontzertua eskainiko du lurralde honetan, zaleei agur esan eta bere ibilbideari merezitako omenaldia egiteko.

Berezia eta bakarra izango den ikuskizuna

Aurreko edizio biek “sarrerak agortuta” kartela zintzilikatu zuten, eta aurten 6.500 lagunentzako lekua prestatu da, eskaera handiari erantzuteko. Ura Bere Bidean komunitatearentzako aurresalmentan jada hainbat sektore agortu dira.

Sarrerak dagoeneko daude salgai webgunean: www.ubbkorala.eus. Prezioak 17€ eta 39€ bitartekoak dira, eta 12 urtetik beherakoek %20ko deskontua izango dute.

Aurkezpen ofiziala, babes zabalarekin

Ekitaldiaren aurkezpen ofizialean parte hartu zuten hainbat ordezkarik: Iñaki Guturbai (Arabako Foru Aldundiko Berdintasun, Euskara eta Gobernantza diputatua), Kepa Ortiz de Urbina (Laboral Kutxako komunikazio arduraduna), Alex Sardui (Gatibuko abeslaria), Miguel Ángel Otazu (Samaniego Abesbatzako presidentea) eta Saioa Eibar (Fair Saturday Fundazioaren sortzailea).