Zanbranako La Pauleja hezegunea lehengoratzeko lanak amaitu dira

Zanbranako La Pauleja hezegunea lehengoratzeko lanak amaitu dira. Proiektua Arabako Foru Aldundiaren Aurrekontu Parte-hartzaileen bidez gauzatu da, eta guztira 110.000 euroko aurrekontua izan du.

Esku-hartzea Hezeguneen Lurralde Plan Sektorialean jasotako eremu batean egin da. Helburua izan da hezegunearen funtzionamendu naturala berreskuratzea, ura pilatzeko gaitasuna hobetzea eta ingurune hezeei lotutako biodibertsitatea indartzea.

La Paulejaren egoera hondatuta zegoen, urteetan egindako esku-hartzeen eta nekazaritza-erabilera intentsiboen ondorioz. Eremuan erabiltzen ez zen hormigoizko igerileku zahar bat ere bazegoen.

Lanetan zuhaitz aloktonoak kendu dira, lurra modelatu da eta ura atxikitzeko baldintzak hobetu dira. Gainera, igerileku zaharra naturalizatu egin da, egitura egokituta, iragazgaiztuta eta material naturalekin integratuta.

Esku-hartze horien bidez, hainbat ur-xafla funtzional sortu dira bertako fauna eta landarediarentzat. Proiektuak lehentasunezko habitatak berreskuratzen lagundu du, eta ingurumen-sentsibilizaziorako aukera berriak ireki ditzake Zanbranako ingurune naturalean.