Gasteizko udal liburutegiek 70 jarduera baino gehiago eskainiko dituzte udazkenean

Vitoria-Gasteizko Udal Liburutegi Sareak 70 jarduera baino gehiagoko egitaraua prestatu du urritik abendura bitartean. Haur, gazte eta helduentzako proposamenak izango dira udal liburutegietan eta gizarte etxeetan: ipuin kontalariak, musika, tailerrak, literatura-klubak, antzerkia eta hitzaldiak, besteak beste.

Kultura eta Hezkuntza zinegotzi Sonia Díaz de Corcuerak azpimarratu duenez, “gaur egun irakurketak lehiakide asko ditu: filmak, telesailak, bideojokoak… baina irakurketak pentsamendu kritikoa pizten du eta hausnarketarako bidea ematen digu”. Horregatik, helburua da “herritarrak liburutegietara hurbiltzea” eta “irakurketa-ohiturak sustatzea”.

Egitarauan badaude nobedadeak, hala nola hilekoari buruzko tailer bat neska gazteentzat edo manga bidez Japoniako kultura lantzeko saio bat. Berriz itzuliko da ‘Idazteaz beste’ euskarazko literatura-gunea, eta ‘Leer, pensar y compartir’ irakurketa-kluba Arana gizarte etxera lekualdatuko da Judimendiko obrak direla eta.

Gainera, urriaren 25ean eta 26an, Iradier Arenan XV. Liburu Truke Azoka egingo da. Parte-hartzaileek 5 liburu arte trukatu ahal izango dituzte, eta 5.000 liburu baino gehiago egongo dira eskuragarri. Asteburuan zehar haurrentzako tailerrak, musika eta ikuskizunak ere izango dira.

Informazio osoa udal webgunean eta liburutegietako eskuorrietan dago eskuragarri.