Francisco Franco diktadoreari eta Emilio Mola jeneral kolpistari emandako ohorezko tituluak baliogabetzeko proposamena izapidetzearen aldeko iritzia agertu du Arabako Foru Aldundiak. Foru Gobernuaren Kontseiluak astearte honetan hartutako erabakia Elkarrekin Arabak, EH Bilduk, PSE-EEk eta EAJ-PNVk Batzar Nagusietan erregistratutako proposamen bati erantzuten dio.
Foru-arauak planteatzen du Gerra Zibilean eta diktaduran emandako Probintziako Aitaren* eta Ohorezko Diputatu Nagusiaren* tituluak kentzea eta titulu horien deuseztasuna formalki deklaratzea. Era berean, foru-erregistro eta -artxiboetan ezeztapen hori jasota uztea proposatzen da, ahalik eta hedapen instituzional handiena bermatuz.
Foru Gobernuak uste du ekimena bat datorrela memoria demokratikoan indarrean dagoen lege-esparruarekin, bereziki Estatuko 20/2022 Legearekin eta EAEko 9/2023 Legearekin, balio demokratikoekin bateraezinak diren edo frankismoaren goraipamena dakarten bereizketak berrikusi eta ezabatzera behartzen baitute.
Gobernu Kontseiluak azpimarratu du neurriak egiaren, justiziaren, erreparazioaren eta ez errepikatzeko bermearen printzipioei erantzuten diela, eta bizikidetzarekiko, aniztasunarekiko eta giza eskubideekiko konpromiso instituzionala indartzen duela.
Aldundiak Batzar Nagusiei helarazi die aldeko jarrera, eta orain erabaki beharko dute araua izapidetzen hasiko diren ala ez. Legegintza-prozesuak datozen asteetan jarraituko du.
