Gazte Sortzaileak ekimenak 4.000 eurorainoko laguntzak eskainiko ditu

Gazte Sortzaileak bekaren hamabigarren edizioak izena emateko epea zabaldu du, 16 eta 35 urte arteko gazteek euskarazko sormen-proiektuak garatu ahal izan ditzaten, aholkularitza profesionalarekin eta 4.000 eurorainoko laguntzekin. Interesa dutenek ekainaren 30era arte aurkeztu ahal izango dituzte proposamenak, eta deialdiak guztira 20.000 euroko zuzkidura du.

Programa euskarazko ahozko adierazpenarekin eta hizkuntza horretako kulturaren sustapenarekin lotutako proiektuei zuzenduta dago. Proposamenek hainbat formatutakoak izan daitezke, hala nola antzerkia, musika, bakarrizketa, poesia-errezitaldia, bertsolaritza edo ikus-entzunezkoak, eta genero bat baino gehiago ere uztartu ahal izango dituzte. Hala ere, formatu txikiko jarduerak lehenetsiko dira.

Deialdiak bi adin-tarte aurreikusten ditu: bata 16 eta 24 urte artekoentzat, eta bestea 25 eta 35 urte artekoentzat. Parte-hartzea banaka edo taldean egin ahal izango da, betiere eskatzaileak Vitoria-Gasteizen edo Araban erroldatuta badaude. Proiektuak San Martingo Bulego Teknikoetan, gizarte-etxeetako Herritarren Arretarako Bulegoetan edo udalaren egoitza elektronikoaren bidez aurkeztu ahal izango dira. Adingabeek, gainera, aita, ama edo legezko tutorearen baimena aurkeztu beharko dute.

2025eko edizioan, 14 gaztek hartu zuten parte, eta guztira 11 proiektu aurkeztu ziren. Hautatutako lanak apiriletik irailera bitartean aurkeztuko dira Gasteizko hainbat gunetan. Horien artean daude Bi Rotxa podcasta Baratza aretoan, Kutxatu Gasteiz egitasmoaren aurkezpena Aldabe gizarte-etxean, Garun Null proiektuaren estreinaldia Izaskun Arrue Kulturgunean, baita Bizitza baten koplak bakarrizketa eta Doluak diskoaren aurkezpena ere.