Gasteizek mugikortasuna planifikatzeko biki digitala sortuko du

Gasteizko Udalak mugikortasunaren biki digitala sortuko du, hiriko joan-etorriak hobeto aztertu, simulatu eta planifikatzeko. Tresna hori hiriaren funtzionamenduaren irudikapen birtuala izango da, eta Mugikortasun Jasangarriaren eta Espazio Publikoaren Plan berria lantzeko lagungarria izango da.

Proiektua Ingurugiro Gaietarako Ikastegiak, CEAk, garatuko du Europako egitasmo baten barruan. Gasteizekin batera, Milan, Cork, Kalamata eta Lappeenranta hiriek ere parte hartuko dute.

Neurriak aplikatu aurretik simulatzea

Maider Etxebarria Gasteizko alkateak azaldu duenez, biki digitala datu errealekin elikatuko da, eta aukera emango du politika jakin batzuen eragina aztertzeko, martxan jarri aurretik.

Tresnak desplazamendu ereduak modelizatzeko, emisioak murrizteko agertokiak aztertzeko, azpiegitura berrien eragina neurtzeko eta hiriko mugikortasunaren plangintza optimizatzeko balioko du.

Etxebarriak aipatutako adibideetako bat da kale jakin batzuetan abiadura aldatzeak izan ditzakeen ondorioak aurrez ikusteko aukera.

Europako laguntza duen proiektua

Sistemak adimen artifiziala erabiliko du agertoki konplexuak lantzeko eta mugikortasunaren arloan erabaki publikoak hartzen laguntzeko.

Europar Batasunak 195.000 euro jarriko ditu Gasteizen aurreikusitako ekintzak garatzeko.

Etxebarriaren arabera, ekimenak aukera emango dio hiriari beste Europako hiri batzuekin ezagutza partekatzeko eta Gasteizek mugikortasun jasangarriaren arloan duen esperientzia zabaltzeko.