Olentzero eta Mari Domingi, protagonista Gasteizko kaleetan

Atzo arratsaldean, abenduaren 24an, milaka pertsona atera ziren kalera Olentzero eta Mari Domingiri ongi etorria emateko. Euri fina eta hotza izan arren, jai giroa nagusitu zen hasieratik amaierara. Desfilea 18:00etan abiatu zen Iparralde gizarte etxetik eta 19:00ak aldera iritsi zen Andre Maria Zuriaren plazara.

Ibilbidea luzea izan zen: Legutioko Atea, Frantzia kalea, Bake kalea, Olagibel eta Mateo Moraza kalea zeharkatu zituen kalejirak. Herritar ugarik hartu zuten parte, bai alde zaharrean, bai ibilbideko gainerako puntuetan.

400 lagun baino gehiago eta lau karroza

Desfilean 400 lagun baino gehiagok hartu zuten parte, Gasteizko kultura elkarte, ikastetxe eta dantza talde desberdinetatik etorriak. Besteak beste, Judimendiko Joaldunak, Gasteizko erraldoiak, dantzariek, esnetari, ikazkin eta galtzagorriek osatu zuten konpainia.

Lau karroza atera ziren: baso magiko baten irudikapena, Mari Domingiren karroza, Olentzerorena eta azken karroza bat, goxokiak jaurtitzeko erabilia. Gainera, ikusmin handia sortu zuen Haizearen lorategia izeneko ikuskizun ibiltariak, Cal y Canto antzerki taldeak gidatua.

Mezu hunkigarria San Migelgo balkoitik

Desfilea amaitzeko, Olentzero eta Mari Domingi San Migel elizako balkoira igo ziren. Bertatik, plaza beteari hitz egin zioten eta Palestinako haurrak gogoan izan zituzten. Ondoren, ohiko abestiak abestu zituzten: «Mari, Mari Domingi» eta «Olentzero joan zaigu», jendearen txalo artean.

Amaiera berezia izan zuen egunak: plazan gaztain erre banaketa egin zen, eta jai giro beroa nagusitu zen Gasteizko bihotzean.