Ertzaintzak GKE bati eman dio Arabako polizia operatibo batean atzemandako material guztia

Ertzaintzak eta GKE batek indarrak batu dituzte Araban atzemandako materialari irteera solidarioa emateko. 2020an karga-lapurretan zebilen talde bati konfiskatutako arropa, oinetakoak eta txorrotak bidali dituzte Gambiara, hango herrietan banatzeko.

Gasteizen bizi zen talde kriminala

Duela bost urte, Ertzaintzak operazio handia abiatu zuen (Zaragozako eta Nafarroako Guardia Zibilarekin batera), gure lurraldeko industrialdeetan eta kamioi-aparkalekuetan lapurtzen zuen talde baten aurka. Lapurrek gidarien atseden-uneak aprobetxatzen zituzten atoietan sartzeko.

Talde honek Gasteizen zuen basea. Gure hirian alokatutako lokaletan ezkutatzen zuten ostutako guztia, gero Algecirasera eta handik kanpora bidaltzeko. Garai hartan sei pertsona atxilotu zituzten Arabatik igarotzen ziren kamioietan bost lapurreta egitea egotzita.

Berrerabilera solidarioa

Miaketetan aurkitutako arropa eta oinetako guztiak berri-berriak zeuden, baina inork ez zituen erreklamatu. Horrela, Zaragozako epaitegiak baimena eman ondoren, materiala ez suntsitzea erabaki da.

Hala, abendu honen hasieran, laguntza hori guztia Gambiako hainbat herritara heldu da GKE baten bidez. Lapurreta baten ondorio zena, modu onenean amaitu da: behar handiena dutenei laguntzen.