Gasteizko Udalak Judimendiko Sefarad plaza berritzeko lanak esleitu ditu. Artarria Obra y Rehabilitación enpresak egingo ditu obrak, 340.397,77 euroren truke, eta lau hilabeteko epea izango du lanak amaitzeko.
Proiektuaren aurrekontua hasieran aurreikusitakoa baino %8 txikiagoa da, baina jarduketa guztiak mantenduko dira. Kontratua sinatu ondoren, obrak datozen asteetan hasi ahal izango dira.
Plazaren ipar-mendebaldean pergola berri bat jarriko dute, eguzkitik eta euritik babesteko. Argiteria publikoa ere berrituko da, argi eraginkorragoak eta modernoagoak instalatuta.
Irisgarritasuna hobetzeko, plazaren erdialdeko maila kendu eta arrapala bidezko ibilbide irisgarria egingo da. Horrez gain, eserlekuetako batzuk egurrez estaliko dituzte, erosoagoak izan daitezen.
Beatriz Artolazabal Espazio Publikoaren eta Auzoen zinegotziak nabarmendu du Sefarad plaza Judimendiko topagune nagusietako bat dela. Jarduketa EH Bildurekin lortutako aurrekontu-akordioaren barruan dago, eta auzotarrek egindako eskaerei erantzutea du helburu.